Bu gün Türkiyədə Cümhuriyyətin qurucusu, böyük dövlət xadimi Mustafa Kamal Atatürkün anım günü qeyd olunur.

Türkiyə tarixinin ən mühüm şəxsiyyətlərindən biri olan Mustafa Kamal Atatürk 1938-ci il noyabrın 10-da, saat 09:05-də İstanbulun Dolmabağça sarayında vəfat edib.

Hər il noyabrın 10-da Türkiyənin müxtəlif bölgələrində Atatürkün əziz xatirəsi ehtiramla yad edilir. Saat 09:05-də ölkə üzrə həyat bir anlıq dayanır, sirenlər səslənir, insanlar bir dəqiqəlik sükutla böyük dövlət xadiminin xatirəsini anırlar.

Türkiyə Cümhuriyyətinin qurulmasında mühüm rol oynayan Atatürk milli müstəqillik mübarizəsinə rəhbərlik edib və 1923-cü il oktyabrın 29-da elan olunan Cümhuriyyətin ilk prezidenti olub.

Onun həyata keçirdiyi siyasi, hüquqi, təhsil və sosial islahatlar müasir Türkiyənin formalaşmasında mühüm rol oynayıb.

Mustafa Kamal Atatürkün dövlətçilik irsi, müstəqillik idealları və xalqına xidmət nümunəsi bu gün də Türkiyə xalqının yaddaşında yaşayır.

10 Noyabr – böyük şəxsiyyətin xatirəsinə ehtiram və minnətdarlıq günüdür.

Atatürkü hörmət və ehtiramla anırıq.