22 Noyabr – Ədliyyə işçilərinin peşə bayramı günüdür
Bu gün Azərbaycanda ədliyyə işçilərinin peşə bayramı qeyd olunur.
Hər il noyabrın 22-də ölkəmizdə ədliyyə sistemində çalışan əməkdaşların peşə bayramı qeyd edilir. Bu əlamətdar gün Azərbaycan dövlətçiliyinin hüquqi əsaslarının möhkəmləndirilməsi, qanunun aliliyinin təmin olunması və insan hüquq və azadlıqlarının qorunması istiqamətində çalışan ədliyyə işçilərinin fəaliyyətinə verilən dəyərin ifadəsidir.
Azərbaycan Xalq Cümhuriyyəti 1918-ci il mayın 28-də yaradılarkən Ədliyyə Nazirliyi də təsis edilib. Həmin il noyabrın 22-də Ədliyyə Nazirliyinin ilk Əsasnaməsi təsdiq olunub. Məhz bu tarixi hadisə ədliyyə sisteminin formalaşmasında mühüm mərhələ hesab olunur.
Ümummilli Lider Heydər Əliyevin 11 noyabr 2000-ci il tarixli Sərəncamı ilə noyabrın 22-si Ədliyyə işçilərinin peşə bayramı günü elan edilib.
Bu gün Azərbaycan ədliyyə sistemi dövlət idarəçiliyinin mühüm istiqamətlərindən biri kimi fəaliyyət göstərir. Ədliyyə orqanları qanunvericiliyin təkmilləşdirilməsi, hüquqi xidmətlərin göstərilməsi, notariat fəaliyyəti, məhkəmə qərarlarının icrası, dövlət qeydiyyatı və hüquqi maarifləndirmə sahələrində mühüm vəzifələri həyata keçirir.
Müasir dövrdə ədliyyə sisteminin inkişafı, elektron xidmətlərin genişləndirilməsi, şəffaflığın artırılması və vətəndaşların hüquqi xidmətlərə əlçatanlığının təmin edilməsi əsas prioritetlər sırasındadır.
Ədliyyə işçilərinin fəaliyyəti hüquqi dövlət quruculuğunun möhkəmləndirilməsinə, cəmiyyətdə qanunçuluq və ədalət prinsiplərinin qorunmasına xidmət edir.
22 Noyabr – Ədliyyə işçilərinin peşə bayramı münasibətilə bu məsuliyyətli və şərəfli sahədə çalışan bütün əməkdaşları təbrik edir, onlara möhkəm cansağlığı, peşə fəaliyyətlərində uğurlar arzulayırıq!