22 İyul – Milli Mətbuat Günü münasibətilə
Bəzən bir güllənin bacarmadığını bir cümlə bacarır. Bəzən bir ordunun qazandığı qələbəni dünyaya tanıdan məhz jurnalistin qələmidir. Buna görə də mətbuat sadəcə xəbər yayan bir sahə deyil, xalqın vicdanı, dövlətin səsi və tarixin yaddaşıdır.
Azərbaycan jurnalistikası uzun və şərəfli inkişaf yolu keçib. Bu yolun əsas məqsədi hər zaman həqiqəti yazmaq, xalqın sözünü demək, dövlətçiliyimizi qorumaq və milli dəyərlərimizi yaşatmaq olub. Bu gün informasiya əsrində jurnalistin məsuliyyəti daha da böyükdür. Çünki artıq döyüşlər təkcə səngərlərdə getmir. İnformasiya məkanında aparılan söz savaşı da Vətənin müdafiəsinin ayrılmaz hissəsidir.
Müzəffər Ali Baş Komandan, Azərbaycan Respublikasının Prezidenti İlham Heydər oğlu Əliyevin rəhbərliyi ilə Azərbaycan Ordusunun qazandığı tarixi Zəfər təkcə döyüş meydanında deyil, informasiya cəbhəsində də böyük qələbə idi. Həmin günlərdə dünyanın diqqəti Azərbaycana yönəlmişdi. Xarici mətbuata verilən müsahibələr, faktlara əsaslanan çıxışlar və peşəkar jurnalistlərin hazırladığı reportajlar həqiqətin dünyaya çatdırılmasına mühüm töhfə verdi.
Azərbaycan jurnalistləri qələmləri ilə əsgərlərimizin qəhrəmanlığını tarixə yazdılar, düşmənin yalanlarını faktlarla ifşa etdilər və haqq səsimizi beynəlxalq ictimaiyyətə çatdırdılar.
Mətbuat yalnız müharibə xəbərlərini işıqlandırmır. O, ölkənin inkişafını, quruculuq işlərini, elm və təhsildə əldə olunan nailiyyətləri, mədəniyyətimizi, idman uğurlarımızı, gənclərimizin qazandığı qələbələri, şəhidlərimizin əziz xatirəsini və qəhrəmanlarımızın həyat yolunu gələcək nəsillərə çatdırır.
İdman jurnalistikası da mətbuatın mühüm istiqamətlərindən biridir. Azərbaycan bayrağını beynəlxalq arenalarda ucaldan idmançılarımızın uğurları, onların əzmkarlığı və zəhməti media vasitəsilə milyonlarla insana çatdırılır. Hər qələbə haqqında yazılan sətirlər gələcək çempionların yetişməsinə stimul verir. Çünki qələbənin dəyəri onu xalqa doğru və düzgün çatdırdıqca daha da böyüyür.
Bu gün jurnalist qələmi həm məsuliyyət, həm vicdan, həm də Vətən qarşısında borcdur. Həqiqəti qorumaq, milli maraqları müdafiə etmək, cəmiyyətə düzgün informasiya vermək və dövlətçiliyimizə xidmət etmək hər bir media nümayəndəsinin ali missiyasıdır.
22 İyul – Milli Mətbuat Günü münasibətilə qələmini həqiqətə, Vətənə və xalqa xidmətə həsr edən bütün jurnalistləri ürəkdən təbrik edirəm. Qələminiz iti, sözünüz sanballı, yolunuz daim işıqlı olsun!
Çünki güclü dövlətin güclü ordusu olduğu kimi, güclü və məsuliyyətli mətbuatı da olmalıdır. Qoy Azərbaycan mətbuatı bundan sonra da həqiqətin, milli birliyin və dövlətçilik ideyalarının keşiyində şərəflə dayansın!
Arzu Hüseynova
Fatehler.az-ın təsisçisi, Azərbaycanın ilk cüdoçu xanımlarından biri, İU və “Neftçi” klubunun məşqçisi
