İsrailin Suriyanın Dəra əyalətinin Nəva şəhərinə endirdiyi aviazərbələr nəticəsində azı 10 nəfər həlak olub.
“Report” un məlumatına görə, bu barədə “Syria TV” xəbər yayıb.
Bundan əvvəl “Al-Ikhbaria” telekanalı İsrail hərbçilərinin Nəva yaxınlığında yerləşən Tel-Cümə və Tell əl-Cəbiyə yaşayış məntəqələrinin kənarlarını atəşə tutduğunu bildirib.
Öz növbəsində “Al Watan” qəzeti İsrail ordusunun Nauvuya hücum etdiyini yazıb. Belə ki, bu şəhərin və Dəranın qərbindəki qəsəbələrin sakinləri hərbçilərə müqavimət göstərərək onları geri çəkilməyə məcbur ediblər.
Bundan əlavə, çərşənbə günü axşam saatlarında İsrail Hərbi Hava Qüvvələrinə məxsus qırıcı təyyarələr Suriyanın mərkəzindəki Həma və Homs əyalətlərindəki hərbi aerodromlara hücum edib. Təyyarələr hərbi aerodromlara 20-dən çox zərbə endirib.
İsrail qırıcıları həmçinin Palmira yaxınlığındakı T4 aerodromuna və Dəməşqdə Masaken Berzi bölgəsində keçmiş Suriya ordusuna məxsus hərbi obyektə hava hücumu edib.