“Avtomobil sərgisində ilk dəfə iştirak edirəm. Qatılmaqda məqsədim uşaqlıqdan klassik avtomobillərə olan həvəsimdir”.
Bunu Oxu.Az-a açıqlamasında bulvarda keçirilən retro avtomobillərin sərgisinə qatılan Məhəmməd Quliyev deyib.
“20 yaşım var. Gördüyünüz avtomobil “Triumph Spitfire MK-4” modelidir. İngiltərə istehsalıdır, 1978-ci ilə aiddir.
Bu modelin məşhurlaşması “Ceyms Bond”un ilk seriallarından sonra olub və mən də ilk dəfə onu orada görmüşdüm – “James Bond-1968” filmində.
Avtomobili Almaniyadan yeni gətirmişəm və Azərbaycanda ilk sahibiyəm. Təxminən bir ay olar ki, maşın məndədir və ilk dəfədir ki, bu sərgidə təqdim olunur”, – deyə M.Qulev bildirib.
O qeyd edib ki, Almaniyada bu modelin qiyməti yaxşı vəziyyətdə 20-25 min avro arası dəyişir:
“Amma gətirilməsi ilə birgə ümumi xərcləri nəzərə alanda qiymət 35-40 min avroya qədər yüksəlir. Sərgiyə qatılan bütün retro avtomobil həvəskarlarına uğurlar arzulayıram”.
