Koreya Respublikası prezidentinin səlahiyyətlərini icra edən baş nazir Han Dok Su ABŞ-nin yeni 25% tariflərinin ölkə ixracatçılarına təsirini müzakirə etmək üçün təcili iclas keçirib.
“Report” xəbər verir ki, bu barədə baş nazirin mətbuat xidməti məlumat yayıb.
Müvafiq işçi qrupun iclası yerli vaxtla saat 07:00-da (Bakı vaxtı ilə 02:00) çağırılıb və iclasda həmçinin maliyyə naziri Çhve San Mok, ticarət, sənaye və energetika naziri An Dok Kın, onun ticarət danışıqları üzrə müavinləri Con İn Qyo və sənaye üzrə müavinləri Pak Sonq Thek və xarici işlər nazirinin birinci müavini Kim Hon Qyun iştirak edib.
Han Dok Su bildirib ki, qlobal tarif müharibəsi reallığa çevrilib, vəziyyət çox ciddidir. Onun sözlərinə görə, ticarət böhranından çıxmaq üçün hökumətin bütün potensialını və resurslarını səfərbər etmək lazımdır.
O, avtomobillər də daxil olmaqla, ABŞ tariflərinin təsirinə məruz qalacaq sənaye və şirkətlərə hökumət dəstəyini təmin etmək üçün sürətli addımlar atmağı əmr edib.
